CMVMC San Pedro de Muro

Reúnense en Asemblea Xeral en sesión ordinaria da CMVMC de San Pedro de Muro (Porto do Son), cunha asistencia dun 42,30% do total de persoas comuneiras que a integran (en segunda convocatoria), sendo as 21:00 horas na casa da cultura da parroquia, o día 26 de xuño de 2009, coa seguinte orde do día:

1. Lectura e aprobación, se é o caso, da acta da anterior asemblea (30/01/09)

É aprobada por unanimidade.

2. Aprobación das contas do exercicio 2008

Son aprobadas por unanimidade.

3. Estado das subvencións solicitadas

4. Informe de actividades

Actuacións do Concello de Porto do Son na nosa parroquia:

- Acondicionamento e ampliación do aparcamento do cemiterio de San Pedro do Muro. Acórdase por unanimidade autorizar ao Concello de Porto do Son a realizar as obras do citado proxecto. Malia que esta asemblea considera son escasas e non van a solucionar o problema da conxestión do tráfico.

- Arranxo dalgunha pista da parroquia. Pedíronse os permisos pertinentes para que, a empresa encargada destas obras, poida verter a terra sobrante das gabias (nunca cascallos) a algunha fochanca situada en monte común. Desta maneira conseguimos recuperar solo para uso forestal.

Actuacións do Distrito IV “O Barbanza”: ultimos traballos de desbroce en faixas de protección con respecto a núcleos de poboación (plan de prevención de incendios).

Actuacións da CMVMC de San Pedro de Muro: desbroces - localización de moxóns - xuntanzas interxeracionais - proposta de proxeccicóns de cinemas-documentais - …)

5. Preguntas e aclaracións

- Solicitude ao concello de revisión  do proxecto de acondicionamento e ampliación do aparcamento do cemiterio.

- Proposta interesante de colaboración dunha asociación micoloxica.

.

Non habendo máis asuntos a tratar, sendo as 22:30 horas, levántase a sesión.

A secretaria

DOG nº 115. Luns, 15 de xuño de 2009

Orde do 8 de xuño de 2009 pola que se determina a época de alto perigo de incendios.

Establécese como época de perigo alto de incendios forestais durante o ano 2009 as datas comprendidas entre o 1 de xullo e o 30 de setembro.

Convócanse a tódalas persoas comuneiras pertencentes á Comunidade de Montes Veciñais en Man Común de San Pedro de Muro, á ASEMBLEA XERAL ORDINARIA que terá lugar dacordo a seguinte convocatoria:

Día: venres, 26 de xuño de 2009, ás 16:00 horas

Lugar: casa da cultura de San Pedro de Muro

De non haber quórum suficiente, celebrarase en Segunda Convocatoria ás 21:o0 horas, no lugar indicado cos/as comuneiros/as asistentes.

ORDE DO DÍA

1. Lectura e aprobación, se é o caso, da acta da anterior Asemblea (30/01/09)

2. Aprobación das contas do exercicio 2008 

3. Estado das subvencións solicitadas

4. Informe de actividades

5. Preguntas e aclaracións

Dada a importancia dos temas a tratar, prégase a súa asistencia e puntualidade. Sen outro particular reciba un cordial saúdo.

.

MOI IMPORTANTE: se por calquera motivo non pode vostede (comuneiro/a) asistir á asemblea, o seu suplente ostentará o poder de votación. Ou tamén pode delegar o voto en calquera outra persoa comuneira mediante escrito, que nos deberá entregar a calquera dos membros da directiva antes do comezo da mesma.

Recorde que, para que a asemblea quede legalmente constituída, precísase dunha porcentaxe mínima de persoas participantes.

Ficha para delegar a representación noutro/a comuneiro/a en Asemblea Xeral

O voluntariado é unha forma de participación da sociedade na atención de necesidades na cal conflúen a liberdade de actuación, a solidariedade e o altruísmo.

Nesta materia, o Concello de Porto do Son pon en marcha no ano 2002 a Entidade de Acción Voluntaria Local, co obxectivo de facilitar e promover a participación activa de veciños e veciñas na vida cultural, social, económica e comunitaria do noso concello.

Quen pode ser voluntario/a? Calquera persoa maior de 16 anos que decida libremente dedicar parte do seu tempo, coñecementos, habilidades e cualidades a favor doutras persoas e ó servizo da sociedade en xeral, de xeito altruísta e totalmente desinteresado.

En qué podo colaborar?

• promoción do voluntariado: sensibilización, información, captación, programación de actividades…
• área de servizos sociais: programa de reparto de alimntos, ludoteca municipal, actividades para a infancia, terceira idade ou persoas con discapacidade…
• área de cultura e deportes: colaboración en actividades sociais e culturais (cabalgata de Reis, entroido, campamento urbano, feira celta…) e actividades deportivas (milla urbana, rutas de sendeirismo…).
• área de medio ambiente: actividades de sensibilización e protección medioambiental, deseño e propostas para campañas informativas…

Qué fago para ser voluntario/a? Só tes que achegarte pola Oficina Municipal de Voluntariado onde recibirás toda a información e asesoramento que precises.

Oficina Municipal de Voluntariado

Rúa Atalaya s/n

CP 15970 - Porto do Son

.

A cmvmc de San Pedro de Muro aparece no Boletín Informativo nº 2 da Entidade de Acción Voluntaria de Porto do Son.

Este sábado, 23 de maio de 2009, tivo lugar un novo obradoiro “encontros entre novas xeracións e veteranos/as comuneiros/as de San Pedro de Muro”. Desta volta a xuntanza foi na aldea de Rial, no Bar El Ranchito.

Agradecer a tódalas persoas que están colaborando connosco nesta recollida de inmenso valor para a cultura popular da nosa parroquia.

Atópase exposto no taboleiro de anuncios do Concello de Porto do Son o anuncio de Información Pública referente á solicitude de AUTORIZACIÓN DE VERTIDO DE AUGAS RESIDUAIS, por parte da empresa acuícola situada na aldea de Seráns.

O prazo para alegacións remata en quince días a partir do 16 de abril de 2009.

O pasado mércores, 15 de abril de 2009, comezou na nosa parroquia o Curso de aplicador/manipulador de produtos fitosanitarios (nivel básico).

Para a obtención do carné de manipulador destes produtos é necesario asistir ás clases: 20 horas lectivas na casa da cultura de San Pedro de Muro (de 16:00 a 20:00 horas) e, 7 horas en Guísamo (5 de prácticas e 2 de exame).

Poden ser persoas beneficiarias aquelas que teñan cumpridos os 18 anos antes de rematar o prazo de presentación de solicitudes.

O nivel básico vai dirixido ao persoal auxiliar de tratamentos terrestres e aéreos, e aos agricultores/as que os realicen na súa propia explotación sen empregar persoal auxiliar e utilizando praguicidas que non sexan ou xeren gases clasificados como tóxicos ou moi tóxicos, segundo o disposto no Real Decreto 255/2003.

Organiza: Oficina Agraria Comarcal de Noia

.

A Consellería do Medio Rural abre o período de permisos de queima de rastrollos agrícolas e forestais.

O teléfono 902 112 000 permanece habilitado co obxectivo de facilitar a información que precisen os usuarios e usuarias sobre boas prácticas… ademais de servir para realizar un seguimento por parte da Consellería do Medio Rural, co fin de centralizar os datos de identificación da persoa responsable e localización do sitio para efectuar a queima con garantías de seguridade.

http://mediorural.xunta.es/

Actuacións acometidas nos últimos días no monte veciñal de Muro pola Consellería do Medio Rural; arranxo de pistas forestais e limpeza de gabias.

.

Como ben sabedes, o pasado sábado, tiñamos unha cita en Alboreda…

Máis de unha hectárea de terreo (uns 10.000 m2) quedou repoboado nun tempo récord, con castiñeiros e algún que outro pradairo no monte común de San Pedro de Muro, concretamente no lugar de Alboreda e, en terreos incluídos na Rede Natura 2000.

Comunidade de montes e Distrito IV traballaron conxuntamente para ter todo disposto nesta xornada lúdico-formativa.

Ademais da repoboación, as persoas asistentes regaron as árbores e retiraron todo o lixo que había pola zona. IMPRESIONANTE!!!

Máis fotos…