Lugar: Palacio de Congresos e Exposicións de Galicia (Santiago de Compostela) e no recinto da Feira Internacional Semana Verde de Galicia (Silleda)

Datas: Do 19 ao 22 de novembro de 2008.

Documentos:

          Triptico informativo do Congreso

          Programa do Congreso

Para visionar as ponencias en directo vía web: http://congresovalorizaciondomonte.com/gl/video.asp

Coincidindo coa Semana Verde de Galicia, celebrarase na mañá do vindeiro sábado 22 de novembro, no Recinto Feiral de Silleda, a Primeira Convención das Unidades de Xestión Forestal (UXFOR) e Agrupacións Veciñais de Vixilancia Forestal (AVVF) en Galicia.

A Consellería do Medio Rural agradecendo o esforzo e colaboración no impulso destas iniciativas, polas que tamén aposta a Comunidade de Montes de San Pedro de Muro, quere convidar aos membros destas agrupacións a participar nesta cita.

Imos aló, entón.

Reúnense en Asemblea Xeral en sesión extraordinaria da CMVMC de San Pedro de Muro, cunha asistencia do 30,2 % do total de comuneiros/as que a integran (en segunda convocatoria), sendo as 19:55 horas na casa da cultura da parroquia, o día 18 de outubro de 2008, coa seguinte orde do día:

1. Lectura e aprobación, se procede, da acta da sesión anterior (31/05/08)

É aprobada por unanimidade.

2. Aprobación da creación da Unidade de Xestión Forestal TAHUME 1

Acórdase por unanimidade incluír na uxfor Tahume 1 os terreos percententes a esta comunidade, situados no lugar de A Pedreira, parroquia de San Pedro de Muro.

3. Toma de decisión do futuro do campo de fútbol

Acórdase por unanimidade establecer un prazo non superior a un ano para que algún colectivo desta parroquia lle dea uso ao campo de fútbol. Transcurrido este tempo e, sen interese por parte dos/as veciños/as intentarase buscar saída por fora. (Trátase de evitar o abandono das infraestructuras que tanto lles costou conseguir aos nosos antecesores).

4. Informe das distentas actividades que se están levando a cabo

- programa de actividades 2008:

plantación de castiñeiros (realizado)

charla dos EPRIF (realizado)

I concurso fotográfico “Calcomanías de Muro” (realizado)

I xornada “Froitos do outono” (xornadas micolóxicas - II magosto) (realizado)

encontros entre novas xeracións e veteranos/as comuneiros/as de San Pedro (en breves)

réptiles e outras especies potencialmente perigosas, realidade e falsas lendas (proximamente)

- axudas:

subvencións a proxectos dinamizadores das áreas rurais de Galicia (DOG nº127, do 2 de xullo)

axudas para programas de valorización integral e promoción da multifuncionalidade do monte (DOG nº160, do 20 de agosto)

- proceso de legalización dos terreos “Outeiro do Marisco”

- tema arrendamento da antiga canteira para a súa recuperación para uso forestal

- tema amolloamento

- UXFOR Tahume 1

- AVVF de San Pedro de Muro

- convenio dos tractores (mancomunidade Serra da Barbanza)

- toda a información actualizada no blogue

5. Preguntas e aclaracións

Non habendo máis asuntos a tratar, sendo as 21:25 horas, levántase a sesión.

A secretaria

Un pouco de cultura forestal non está de máis!!!

Data: venres, 31 de outubro de 2008

Lugar: na Casa Forestal de Baroña

Organizan: Sindicato Galego Labrego - Frouma

Colaboran: Mancomunidade de MVMC “Serra do Barbanza” - CMVMC de Baroña

Programa:

16:00 h - INAUGURACIÓN

16:30 h - 1º relatorio: Fiscalidade das comunidades de montes.

17:30 h - 2º relatorio: As unidades de xestión forestal e as agrupacións de propietarios/as como alternativas de xestión sostibel.

18:30 h - DESCANSO

19:00 h - 3º relatorio: Multifuncionalidade do monte. Exposición dun caso real de xestión sostibel do monte.

20:00 h - Mesa redonda

22:00 h - CEA E CLAUSURA

Rógase confirmen asistencia nos teléfonos: 679156855 - 672089609

Este ano tivemos un magosto prematuro pero con castañas a esgalla…

puidemos degustar os cogomelos que apañaron os aventureiros pola mañá.

Nesta I xornada “Froitos de outono” houbo viño, cogomelos, castañas e moitos outros produtos do agro ecolóxico.

O día 18 de outubro tivemos unha xornada completiña:

Ás dez da mañá, comezamos a I xornada “Froitos do Outono”, cunha breve charla sobre o mundo da micoloxía impartida por Miguel, un especialista na temática. Explicounos cómo recoñecer os cogomelos, características, lugares de recollida e outra información relevante.

Logo, saída ao monte na procura de cogomelos. Atopamos sobre todo cantarela (Cantharellus cibarius), que é un bo comestible de cheiro afroitado e sabor doce. A degustación tivo lugar á noitiña, canda o magosto.

Foi unha xornada enriquecedora, acompañada polo bo tempo e, á que pretendemos dar continuidade futura se así o desexan os/as comuneiros/as da parroquia de San Pedro de Muro.

XORNADA MICOLÓXICA

10:00 horas - breve charla introductoria ao mundo da micoloxía na casa da cultura de San Pedro de Muro

11:00 a 14:00 horas - saída ao campo para a colleita de cogomelos

Compre levar unha cesta e navalla. Ademais, recoméndase calzado cómodo e chuvasqueiro..

II MAGOSTO

a partir das 21:00 horas (despois da asemblea da comunidade de montes) - castañada, degustación de cogomelos, actuación musical e outras sorpresas…

A Presidenta da Comunidade de Montes Veciñais en Man Común de San Pedro de Muro convoca a tódolos/as comuneiros/as pertencentes á mesma, á Asemblea Xeral Extraordinaria que terá lugar dacordo coa seguinte convocatoria:

Día: 18 de outubro de 2008, ás 17:00 horas

Lugar: casa da cultura de San Pedro de Muro

De non haber quórum suficiente, celebrarase en Segunda Convocatoria ás 19:00 horas, no lugar indicado cos /as comuneiros/as asistentes.

ORDE DO DÍA

1. Lectura e aprobación, se procede, da acta da sesión anterior (31/05/2008)
2. Aprobación da creación da Unidade de Xestión Forestal TAHUME 1
3. Toma de decisión do futuro do campo de fútbol
4. Informe das distintas actividades que se están levando a cabo
5. Preguntas e aclaracións

A asistencia ás Asembleas é obrigatoria para tódalas persoas comuneiras de pleno dereito, porque é aí onde se toman as decisións importantes para o futuro do monte e, todos/as debemos ser partícipes xa que a todos/as nos concirne.

Ademais, de non poder asistir o/a comuneiro/a á asemblea, poderao facer o/a suplente e, mesmo de non poder asistir tampouco éste/a último/a, o/a comuneiro/a poderá delegar a súa representación en calquer outro/a comuneiro/a (veciño/a, amigo/a). Tan só terá que facer chegar a Ficha para delegar a representación noutro/a comuneiro/a en Asemblea Xeral debidamente cumplimentada, antes do comezo da mesma.

Que San Pedro de Muro teña un monte ben xestionado é cuestión de tempo, compromiso e moito esforzo pero entre todos/as é máis doado.

Nestes últimos días véñense realizando desbroces en diferentes puntos do monte veciñal en man común da nosa parroquia. Con estas tarefas de limpeza conseguimos abaratar custes grazas a un acordo adoptado entre a administración e a mancomunidade “Serra da Barbanza”.

De seguro quedan moitas zonas aínda por xestionar pero imos polo bo camiño.

Co fin de legalizar a situación dos terreos situados no lugar de “Outeiro do marisco”, aprobouse no Pleno Municipal o pasado venres, 26 de setembro de 2008, a cesión ao concello de Porto do Son dos terreos pertencentes á Comunidade de Montes para asentar un espazo sociocultural e deportivo.

En contraprestación, o concello vai proporcionar á devandita comunidade, unha sede debidamente equipada co mobiliario imprescindible para levar a cabo as actividades propias da institución.

O acordo foi aprobado unanimemente por tódolos partidos políticos.